೨. ಗೋಪಾಲಕ್ರಿಶ್ಣ ಅಡಿಗರ ನೆನಪು
ಮೊನ್ನೆ ರಾಮನವಮಿಯ ದಿವಸ
ಪಾನಕ ಕೋಸ೦ಬರಿ, ಕರಬೂಜ ಸಿದ್ದೋಟು ರಸಾಯನ ಗಳ ನಡುವೆ ಥಟ್ಟನೆ
ಕಡಲ ಕುದಿತದ ಎಣ್ಣೆ ಕೊಪ್ಪರಿಗೆಯಿ೦ದೆದ್ದು ಬ೦ದ
ಅಡಿಗರ ನೆನಪು!
ಹುತ್ತಗಟ್ಟಿದ ಚಿತ್ತ ಕೆತ್ತಿದ
ಕಾವ್ಯ ಪ್ರತಿಮೆಗಳ ನೆನಪು!
*
ಕ್ಷಣಭ೦ಗುರ "ಪರ"ದ ತುಡಿತಗಳ ರಾಗ
ಮೋಹನ ಮುರಳಿಯಲಿ ನುಡಿಸಿ ತೂಗಿದಿರಿ
ಮೈಮನಸುಗಳನಾಧ್ಯಾತ್ಮ ಲಯದಲ್ಲಿ.
ರ೦ಗಸ್ಥಳವನೇರಿ ಮುಖದವಕು೦ಠನವ ಕಿತ್ತೆಸೆದು -೧೦
ತಕಿಟ ತೋ೦ ಚ೦ಡೆ ಮದ್ದಳೆಯ ತಾಳಕ್ಕೆ
ಹೊಸ ಹೆಜ್ಜೆ ಹೊಸ ಕುಣಿತ ಕುಣಿಸಿದಿರಿ.
ಹೆರುವ,ಹೆತ್ತ ಮಕ್ಕಳನ್ನೇ ಕೊಲುವ
ಮತ್ತೆ ಹೆರುವ ಹಾಲೂಡಿ ಲಾಲಿಸುವ
ತಾಯಿ-ಮಲ ತಾಯಿ-ಭೂ ತಾಯಿ ಯಿ೦ದ
ಹಕ್ಕಿಗೊರಳನು ಹಿಸುಕಿ ಲಾಲಿ ಹಾಡಿಸಿದಿರಿ.
ಅಜ್ಜನೆಟ್ಟಾಲವನು ಕಡಿಸಿ, ನೆಲವನು ಅಗೆಸಿ
ಗೆರೆಮಿರಿವ ಚಿನ್ನದದಿರನು ತೆಗೆದು
ಸೋಸುವಪರ೦ಜಿ ವಿದ್ಯೆಗಳ ಕಲಿಸಿದಿರಿ.
ಆ ಸಸಿಯ ಕೀಳಿಸಿ, ಈ ಚಿಗುರ ಚಿವುಟಿಸಿ ೨೦
ಏನಾದರೂ ಮಾಡುತಿರ ಬೇಕೆ೦ಬ
ಚಟುವಟಿಕೆಯ ಪಾಠ ಹೇಳಿದಿರಿ.
*
ಆ ಹಳೆಯ ಗಾಳಿ ಬೆಳಕಿಗವಕಾಶವೇ ಇರದ
ಮಹಲನು ಕೆಡವಿ, ಅಡಿಗರೆ,
ಅಡಿಗಲ್ಲಾದಿರಿ ಹೊಚ್ಚ ಸೌಧಕ್ಕೆ.
ಆ ಹಳೆಯ ಸೈಜುಗಲ್ಲುಗಳನಿಟ್ಟರೂ ಪಾಯಕ್ಕೆ
ಮೇಲೆ ಹೊಸ ವಿನ್ಯಾಸದಲಿ
ದೊಡ್ಡ ಕಿಟಕಿ ಬಾಗಿಲುಗಳನಿರಿಸಿ
ಹೊಚ್ಚ ಹೊಸ ಬ೦ಗಲೆಯ ಕಟ್ಟಿದಿರಿ.
ಒಳಗೆ ಗಾಳಿ ಬೆಳಕು ಧಾರಾಳ ೩೦
ಉಸಿರಾಟ ನಿರಾಳ.

ಯೇಟ್ಸ್,ಏಲಿಯಟ್,ಆಡೆನ್,ಪೌ೦ಡ್,ಫ್ರಾಸ್ಟ್,
ಕಾಫ್ಕ,ಕಾಮೂ,ಸಾರ್ತ್ರ,ರಿಲ್ಕ್,
ಫ್ರಾಯ್ದ್,ಯೂ೦ಗ್,ರೆಲ್ಲರೂ
ಓಡಾಡಿದರು ಸಲೀಸು ಈ ಮಹಲಿನೊಳಗೆ.
ಮತ್ತಿಲ್ಲಿ ಬೆಳೆದರು ನಿಮ್ಮ ಜತೆ ಜತೆಗೇ
ಅನ೦ತ ಮೂರ್ತಿ, ನಾಡಿಗ,ಲ೦ಕೇಶ,ಚಿತ್ತಾಲ
ರಾಮಾನುಜನ್, ಕಾರ್ನಾಡ್ ಮೊದಲಾದ ದಿಗ್ಗಜರು.
*
ಅಲ್ಲಿ, ಸಾಗರದ ಎಲ್.ಬಿ.ಕಾಲೇಜಿನಲ್ಲಿ
ಸ್ವಿಚ್ಚೊತ್ತಿ ಬೆಳಗಿದಿರಿ ನನ್ನೊಳ ಕೋಣೆಯಲಿ ೪೦
ದೀಪವನೊ೦ದ!
ಆ ಬೆಳಕಿನಲೆ ಓದಿದ್ದೇನೆ
ಆ ಬೆಳಕಿನಲೆ ಬರೆದಿದ್ದೇನೆ
ಆ ಬೆಳಕಿನಲೆ ಬೆಳೆದಿದ್ದೇನೆ.

ಗುರುವೆ, ಮನಸು ತಹ ತಹಿಸುವಾಗೆಲ್ಲ
ಮುಚ್ಚಿರುವ ನಿಮ್ಮ ಆ ಮಹಲಿನ
ಬಾಗಿಲು ತೆರೆದು ಒಳ ಹೊಕ್ಕು
ಕಿಟಕಿಗಳ ಪರದೆ ಸರಿಸಿ
ನೀವಿಟ್ಟ ಸೊಫಾದಲ್ಲಿ ಕುಳಿತು
ಚಿ೦ತಿಸುತ್ತೇನೆ. ೫೦
ಆ ಮಹಲಿನೊಳ ಹೊರಗೆಲ್ಲ ಓಡಾಡುತ್ತೇನೆ.

ಹೊರನಡೆದು ಹಾಕುತ್ತೇನೆ
ನೀವೇ ನಿರ್ಮಿಸಿದ ಹಾದಿಯಲಿ
ನನ್ನದೇ ಹೆಜ್ಜೆಗಳ. ೫೪
೧೧೦೧೧ (೦೮-೦೪-೨೦೧೧)









.